Toshkentdagi Wendy’s restoranlari atrofida tushunarsiz mojaro kelib chiqdi. SES o‘z ayblovlarini rad etib, xodim xato qilganini aytdi.
Hammasi ijtimoiy tarmoqlardagi salbiy videolardan boshlanib, keyinchalik telekanallarda brend obro‘siga putur yetkazuvchi lavhalar bilan davom etdi. Ushbu materiallarda restoranlarda go‘yoki sanitariya qoidalari buzilayotgani iddao qilingan edi. Biroq voqealarning ketma-ketligi va bir vaqtda yuz bergani ko‘plab savollarni keltirib chiqardi.
O‘zbekistondagi Wendy’s tarmog‘i rahbari Shoxruh Jalilov mazkur holatni uyushtirilgan tazyiq deb atadi. Kompaniya har bir ayblov bo‘yicha raddiya berib, 1-may kuni olingan rasmiy laboratoriya xulosalarini taqdim etdi.
Unga ko‘ra, tarmoqning barcha mahsulotlari xavfsiz va sanitariya me’yorlariga to‘liq javob beradi. Kompaniya vakillari, shuningdek, zamonaviy uskunalar yog‘ ifloslangan taqdirda ishlashni to‘xtatishini tushuntirib, barcha ayblovlarni rad etdi.
Vaziyat Sanitar-epidemiologik osoyishtalik qo‘mitasining kutilmagan bayonotidan so‘ng yanada chigallashdi. Idora o‘zining avvalgi ayblovlarini inkor etib, Wendy’s mahsulotlari sog‘liq uchun xavfli emasligini ma’lum qildi.
Rasmiylar noto‘g‘ri ma’lumot tarqalishini «alohida bir xodimning xatosi» deya izohladi va unga intizomiy chora ko‘rilganini bildirdi. Bunday holat fastfud bozoridagi kurash usullari o‘zgarganidan darak bermoqda. Endilikda navbatdagi qadam Raqobat qo‘mitasi tomonidan qo‘yilishi kutilmoqda.
