Soliq qo‘mitasi umumiy ovqatlanish korxonalari uchun QQS stavkasini 0 foizga tushirish imkoniyatini ko‘rib chiqmoqda. Imtiyoz ishchi o‘rinlarini saqlagan va tushum hajmini ta’minlagan tadbirkorlarga beriladi.
Ushbu tashabbus xalqaro tajribaga asoslangan bo‘lib biznesni legallashtirish va xufyona iqtisodiyotga barham berishni ko‘zda tutadi. Nol darajali stavkani qo‘llash uchun tadbirkorlar davlat tomonidan belgilangan bir qator iqtisodiy shartlarni bajarishlari talab etiladi.
Yangi tizimga ko‘ra tadbirkorlarga standart yoki imtiyozli soliq rejimidan birini tanlash ixtiyori beriladi. Agar restoran yoki kafe ma’lum miqdordagi xodimlar sonini (masalan 20 kishi) saqlab qolsa va belgilangan yillik tushum hajmini ta’minlasa u QQS to‘lashdan ozod etiladi. Bunday sharoitda korxona uchun faqat foyda solig‘i va ijtimoiy soliq to‘lash majburiyati qoladi. Soliq qo‘mitasi raisi o‘rinbosari Jahongir Abdiyevning ta’kidlashicha bu kabi imtiyozlar biznes ko‘rsatkichlarini yaxshilash evaziga beriladigan maqsadli yordam hisoblanadi.
Hozirda ushbu taklifni soha vakillari bilan kengroq muhokama qilish va bozorning bu yangilikka tayyorligini o‘rganish rejalashtirilgan. Soliq organlari tadbirkorlar bilan o‘zaro manfaatli kelishuvga erishishni ko‘zlamoqda. Agar ushbu loyiha ma’qullansa umumiy ovqatlanish shoxobchalari o‘z faoliyatini yanada kengaytirish va ishchilarga rasmiy maosh to‘lash imkoniyatiga ega bo‘ladi. Bu esa o‘z navbatida xizmat ko‘rsatish sifatining oshishiga va narxlarning barqarorlashishiga xizmat qiladi.
Izohlar
Hozircha izohlar yo‘q