Poytaxtning Feruza dahasida ikki yengil avtomobil ishtirokida ayanchli avariya qayd etildi. Onix va Gentra rusumli mashinalarning o‘zaro urilishi natijasida Onix muvozanatni yo‘qotib, ag‘darilib tushgan.
Eng tashvishlanarli jihati shundaki, zarba va ag‘darilish vaqtida salon ichida yo‘lovchilar bo‘lgan. Voqea joyidan olingan tasvirlar to‘qnashuvning naqadar shiddatli bo‘lganidan dalolat bermoqda.
Dastlabki olingan ma’lumotlarga ko‘ra, halokatga haydovchilardan birining qat’iy belgilangan harakat tartibini buzgani sabab bo‘lgan bo‘lishi mumkin. Gentra haydovchisi ikkinchi qatordan kutilmaganda chapga burilishga uringan va shu vaqtda o‘z yo‘lida, ya’ni birinchi qatorda to‘g‘ri ketayotgan Onix bilan to‘qnashgan. Yon tomondan berilgan kuchli zarba Onix’ning ag‘darilishiga sabab bo‘lgan. Hozirda shifokorlar va huquq-tartibot idoralari xodimlari jabrlanganlarning holati hamda hodisa tafsilotlarini o‘rganmoqdalar.
