Toshkentdagi yangi yo‘l tugunida devor qulab tushdi va yuqori qatlamdagi yo‘l qismi cho‘kib ketdi. Temur Malik va Buyuk Ipak Yo‘li ko‘chalari kesishmasida transport harakati vaqtincha cheklangan.
Voqea joyidan olingan kadrlar ijtimoiy tarmoqlarda tez tarqaldi. Videoda ko‘prik konstruksiyasining ichki qismlari ochilib qolgan holda yo‘l qoplamasining katta qismi vayron bo‘lgani ko‘rinadi.
Dastlabki ma’lumotlarga ko‘ra, hodisa oqibatida jabrlanganlar yo‘q. Biroq yo‘l tugunining o‘tkazuvchanligi keskin kamaygani sababli sobiq “Lunacharskiy” aylanmasi hududida katta tirbandliklar yuzaga kelgan.
Hozircha Toshkent shahar hokimligi va Ichki ishlar bosh boshqarmasi hodisa sabablariga oid batafsil izoh bermagan. Haydovchilarga ushbu hududni aylanib o‘tuvchi muqobil yo‘llarni oldindan rejalashtirish tavsiya etilmoqda.
