Toshkent shahrining Yunusobod tumanida Tracker haydovchisi sobiq turmush o‘rtog‘i va uning tanishlarini qasddan urib yubordi.
Poytaxt IIBB ma’lumotlariga ko‘ra, voqea 26-mart kuni soat 12:15 larda Niyozbek yo‘li ko‘chasida sodir bo‘lgan.26 yoshli erkak Tracker rusumli avtomashinasini boshqarib borayotib, sobiq turmush o‘rtog‘i bilan yuzaga kelgan janjaldan so‘ng, uni va yonidagi tanishlarini qasddan urib yuborgan.
Ushbu hodisa natijasida ayol kishi va uning bir nafar tanishi turli darajadagi tan jarohatlari olib, tibbiy muassasaga yuborilgan. Dastlabki tibbiy ko‘rik natijalariga ko‘ra, jabrlanuvchilar yengil jarohat olganlari qayd etilgan. Mazkur holat aks etgan videotasvirlar ijtimoiy tarmoqlarda tarqalib, jamoatchilik orasida keskin norozilik va muhokamalarga sabab bo‘ldi. Ko‘pchilik buni nafaqat yo‘l harakati qoidalarini buzish, balki qasddan sog‘liqqa zarar yetkazishga bo‘lgan suiqasd sifatida baholamoqda.
Hozirda mazkur vaziyat Ichki ishlar vazirligi rahbariyatining shaxsiy nazoratiga olingan. Huquq-tartibot idoralari tomonidan zaruriy surishtiruv va tekshiruv harakatlari olib borilmoqda. Aybdor shaxsga nisbatan qonunchilikda belgilangan tartibda jazo chorasini tayinlash masalasi ko‘rib chiqilmoqda. Mutaxassislar bunday holatlar oilaviy-maishiy nizolarning og‘ir oqibatlarga olib kelishi mumkinligini yana bir bor tasdiqlashini ta’kidlab, fuqarolarni vazminlikka chaqirmoqda.
Izohlar
Hozircha izohlar yo‘q