Toshkent metropoliteni uchun xarid qilingan 14 ta yangi poyezd to‘liq olib kelindi. Natijada vagonlar parkining qariyb 70 foizi yangilandi va oraliq intervallar qisqardi.
Vagon parkining yangilanishi va oraliq intervallar
Toshkent metropoliteni uchun mo‘ljallangan 14 ta yangi poyezd — jami 56 ta vagon yangi o‘quv yili boshlangunga qadar poytaxtga to‘liq olib kelindi. Transport vazirligi xabariga ko‘ra, ushbu xarid natijasida metropoliten vagon parkining qariyb 70 foizi yangilandi.
Yangi avlod poyezdlari metropolitenning to‘rtta yo‘nalishida harakatga chiqarildi. Bu ayniqsa tig‘iz vaqtlarda poyezdlar orasidagi oraliq vaqtni (intervalni) sezilarli darajada qisqartirish imkonini berdi.
Hozirgi kunda tig‘iz vaqtlardagi harakatlanish intervallari:
-
Chilonzor yo‘nalishi: 1,5–2 daqiqa
-
O‘zbekiston yo‘nalishi: 3 daqiqa
-
Yunusobod yo‘nalishi: 4 daqiqa
-
Yerusti halqa yo‘nalishi: 7–8 daqiqa
Metroda navbatdagi yo‘lovchi tashish rekordi
Poyezdlar va harakat intervallarining maqbullashtirilishi yo‘lovchilar oqimining ortishiga xizmat qilmoqda. 21-sentabr kuni Toshkent metropolitenida navbatdagi rekord ko‘rsatkich qayd etilib, bir kunda 1 mln 181 ming 581 nafaryo‘lovchiga xizmat ko‘rsatildi.
Bundan avvalgi rekord ko‘rsatkich ham yaqindagina — 2026-yil 14-sentabr kuni qayd etilgan bo‘lib, o‘shanda metrodan 1 mln 165 ming 550 nafar kishi foydalangan edi.
Izohlar
Hozircha izohlar yo‘q