Toshkent metrosining «Xalqlar do‘stligi» bekatida 1984-yilda ishlab chiqarilgan poyezdda nosozlik yuz berdi. Yo‘lovchilar tushirilib, tarkib ko‘rikka yuborildi.
Toshkent metropoliteni rahbariyati ijtimoiy tarmoqlarda tarqalgan «Xalqlar do‘stligi» bekatida poyezdning majburiy to‘xtashi bilan bog‘liq xabarlarga rasmiy munosabat bildirdi. Ma’lum qilinishicha, hodisaga tarkibda yuzaga kelgan qisqa muddatli texnik nosozlik sabab bo‘lgan. Holat 28-mart kuni soat 11:49 da 1984-yilda ishlab chiqarilgan 15-sonli poyezd bekatga kirib kelayotgan vaqtda qayd etilgan.
Nosozlik aniqlangan zahoti mashinist o‘rnatilgan yo‘riqnomaga asosan harakat qilib, vaziyat haqida dispetcherga xabar bergan va yo‘lovchilarni xavfsiz tarzda platformaga tushirgan. Shundan so‘ng, nosoz poyezd yo‘nalishdan olinib, ko‘rikdan o‘tkazish va kamchiliklarni bartaraf etish uchun texnik ko‘rik punktiga yuborilgan. Hozirda metropoliten mutaxassislari vaziyatni to‘liq nazoratga olganliklarini ma’lum qilishdi.
Ushbu texnik uzilish metroning umumiy harakat jadvaliga jiddiy ta’sir ko‘rsatmagan va yo‘nalishdagi boshqa poyezdlar belgilangan vaqtda harakatlanishda davom etgan. Metropoliten ma’muriyati keltirilgan noqulayliklar uchun yo‘lovchilardan uzr so‘rab, xavfsizlik choralarini kuchaytirish bo‘yicha qo‘shimcha ishlar olib borilayotganini ta’kidladi.
Izohlar
Hozircha izohlar yo‘q