O‘zbekiston Sog‘liqni saqlash vazirligi 2025-yil 15-dekabrdagi elektron retseptlar tizimini bosqichma-bosqich yo‘lga qo‘yish to‘g‘risidagi buyruqni o‘z kuchini yo‘qotgan deb topish bo‘yicha loyihani jamoatchilik muhokamasiga chiqardi.
Ushbu tashabbus farmatsevtika sohasini raqamlashtirish bo‘yicha rejalashtirilgan keng ko‘lamli islohotlarning kelajagini shubha ostiga qo‘ymoqda. Mazkur tizim dori vositalarining noqonuniy aylanishiga chek qo‘yish, aholi o‘rtasida o‘zboshimchalik bilan davolanish holatlarini kamaytirish hamda qog‘ozbozlikka chek qo‘yish maqsadida ishlab chiqilgan edi.
Rejaga ko‘ra, elektron shakldagi retseptlar dori vositalari harakatini shifokordan dorixonagacha bo‘lgan zanjirda shaffof nazorat qilish imkonini berishi, qog‘oz hujjatlarni qalbakilashtirish ehtimolini butunlay yo‘q qilishi lozim edi.
Elektron retseptlar tizimi Prezident qarorlari asosida barcha tibbiyot muassasalari uchun majburiy etib belgilanishi va bemorlarga dori vositalarini SMS-kod yoki QR-kod yordamida sotib olish imkonini berishi kutilayotgan edi.
Biroq tizimni amaliyotga tatbiq etish jarayonida tadbirkorlik subyektlari va tibbiyot xodimlari tomonidan qator e’tirozlar bildirildi. Farmatsevtika korxonalari o‘z kassa tizimlarini vazirlik bazasiga integratsiya qilish xarajatlari yuqoriligidan shikoyat qilgan bo‘lsa, hududlardagi shifokorlar zarur texnik jihozlar yetishmasligi hamda internet aloqasining past sifati tufayli qiyinchiliklarga duch keldilar.
Hozircha vazirlik ushbu loyihani butunlay to‘xtatadimi yoki xatolarni inobatga olgan holda takomillashtirilgan yangi platformani taqdim etadimi, degan savol ochiqligicha qolmoqda.
