2035-yilgacha soliq imtiyozlari: O‘zbekiston hukumati Qoraqalpog‘istonni yirik kripto-klasterga aylantirmoqda. Besqala Mining Valley rezidentlari muqobil energiya manbalaridan foydalanishi mumkin.
O‘zbekiston Prezidentining 2026-yil 17-apreldagi qaroriga muvofiq, Qoraqalpog‘iston Respublikasi hududi to‘liqligicha Besqala Mining Valley maxsus mayning zonasi deb e’lon qilindi. Ushbu loyiha doirasida yuridik shaxslarga belgilangan tartibda kripto-aktivlarni qazib olish faoliyati bilan shug‘ullanish imkoniyati beriladi. Tadbirkorlar energiya ta’minoti uchun nafaqat umumiy tizimdan, balki vodorod stansiyalari hamda qayta tiklanuvchi energiya manbalaridan ham foydalanishlari mumkin.
Loyiha boshqaruvi uchun «Besqala Mining Valley» direksiyasi tashkil etilib, ruxsatnomalar berish vakolati Istiqbolli loyihalar milliy agentligiga (ILMA) yuklatildi. Mayning natijasida olingan raqamli aktivlarni milliy va xorijiy birjalarda, jumladan to‘g‘ridan-to‘g‘ri shartnomalar asosida sotishga ruxsat beriladi. Eng muhim jihati, rezidentlar uchun 2035-yilning 1-yanvariga qadar daromad solig‘i va boshqa majburiy to‘lovlardan to‘liq ozod qilinish ko‘zda tutilgan. Hududda faoliyat boshlamoqchi bo‘lgan tadbirkorlar Direksiyaga rezidentlik maqomini olish uchun ariza topshirishlari lozim.
Izohlar
Hozircha izohlar yo‘q