Qamchiq dovonida yuk mashinasi ag‘darilib, mahsulotlar yo‘lga sochilib ketdi. FVV qutqaruvchilari halokat oqibatlarini bartaraf etishdi.
Strategik ahamiyatga ega bo‘lgan Qamchiq dovonida yuk tashuvchi transport vositasi ishtirokida yo‘l-transport hodisasi yuz berdi. Haydovchi boshqaruvni yo‘qotishi oqibatida og‘ir vaznli mashina yonboshiga ag‘darilgan, uning ichidagi barcha mahsulotlar esa yo‘lning qatnov qismiga sochilib ketgan.
Favqulodda vaziyatlar vazirligi matbuot xizmatining xabar berishicha, voqea kecha taxminan soat 11:30 larda sodir bo‘lgan. Baxtli tasodif tufayli avariya oqibatida hech kim tan jarohati olmagan. «Qamchiq» maxsus qidiruv-qutqaruv boshqarmasi xodimlari zudlik bilan voqea joyiga yetib borib, yo‘lni sochilib ketgan yuklardan tozalashdi va harakat xavfsizligini qayta tiklashdi.
