Shavkat Mirziyoyev Mirzo Ulug‘bek tumani hokimligidagi vaziyatlar markazi faoliyati bilan tanishdi. Davlat rahbari sun’iy intellektga asoslangan platformani barcha tumanlarda joriy etish zarurligini ta’kidladi.
Prezident Shavkat Mirziyoyev Toshkent shahrining Mirzo Ulug‘bek tumani hokimligiga tashrif buyurib u yerda joriy etilgan raqamli boshqaruv tizimlarini ko‘zdan kechirdi. Tumanda sun’iy intellekt yordamida ishlovchi «Aqlli tuman» platformasi va maxsus vaziyatlar markazi ishga tushirildi. Ilgari tarqoq holda faoliyat yuritgan 30 ga yaqin tashkilot endilikda yagona tizimga birlashtirildi. Bu esa kommunal ijtimoiy va xavfsizlik masalalaridagi muammolarni masofadan turib aniqlash hamda fuqarolar murojaatlarini tezkorlik bilan hal etish imkonini bermoqda.
Tizimning imkoniyatlari keng bo‘lib u soliq tushumlarini prognoz qilishdan tortib maktablarda o‘quvchilar davomatini nazorat qilishgacha bo‘lgan jarayonlarni qamrab olgan. Xususan «AI Davomat» tizimi voyaga yetmaganlar o‘rtasida nazoratsizlikning oldini olishga xizmat qiladi. Davlat rahbari ushbu raqamli tajribani yuqori baholadi va Toshkentning qolgan barcha tumanlarida ham shunday markazlarni tashkil etishni buyurdi. Shuningdek viloyat hokimlari va huquqni muhofaza qiluvchi organlar rahbarlariga ushbu tajribani joylarda joriy etish vazifasi yuklatildi.
Tashrif davomida tarixiy xotiraga ham alohida o‘rin berildi. Shavkat Mirziyoyev 1992–1996 yillarda ushbu tumanga rahbarlik qilgan davrdagi ish xonasi va o‘sha paytdagi xizmat avtomobili qayta tiklangan holda namoyish etildi. Prezident o‘z faoliyatining o‘sha yillarini yodga olar ekan qabul qilingan muhim qarorlar ekspozitsiyasi bilan ham tanishdi. Bu kabi ko‘rgazmalar davlat boshqaruvidagi izchillik va tuman rivojiga qo‘shilgan ulkan hissa namunasi sifatida xizmat qilmoqda.
Izohlar
Hozircha izohlar yo‘q