15-mart, yakshanba kuni poytaxtning Shayxontohur tumanidagi Botir Zokirov ko‘chasida joylashgan Park in Mall ko‘ngilochar majmuasida yong‘in yuz berdi. Bu haqda Favqulodda vaziyatlar boshqarmasi matbuot xizmati xabar berdi.
Hodisa haqidagi xabar tush vaqtida kelib tushgan. Yong‘in-qutqaruv brigadalari voqea joyiga soat 13:19 da yetib borgan va olovni to‘qqiz daqiqa ichida to‘liq bartaraf etgan. Yong‘in natijasida binoning uchinchi qavatidagi taxminan 25 kvadrat metr maydon zarar ko‘rgan. Rasmiylarning ma’lum qilishicha, hodisa oqibatida hech kim tan jarohati olmagan.
Yong‘in vaqtida savdo markazi tashrif buyuruvchilar uchun yopiq bo‘lgan, chunki hududda qurilish-ta’mirlash ishlari olib borilayotgan edi. Hozirda mutaxassislar yong‘in kelib chiqish sabablari va yetkazilgan moddiy zararni aniqlamoqda.
Keyinchalik Favqulodda vaziyatlar vazirligi yong‘indan so‘ng Park in Mall savdo markazining faoliyatini vaqtincha to‘xtatish to‘g‘risida qaror qabul qildi. Majmua yong‘in xavfsizligi talablariga to‘liq javob beradigan holatga keltirilgunga qadar yopiq qoladi.
Izohlar
Hozircha izohlar yo‘q