O‘zbekiston milliy terma jamoasi Jahon chempionati starti oldidan Niderlandiyaga qarshi o‘rtoqlik uchrashuvida maydonga tushadi. O‘yin Nyu-Yorkda bo‘lib o‘tadi.
Uchrashuv bugun, 8-iyun kuni Nyu-Yorkdagi (AQSH) “Ikan” (Icahn Stadium) stadionida bo‘lib o‘tadi. O‘yinning start hushtagi Toshkent vaqti bilan tunda — soat 23:45 da chalinishi belgilangan.
Fabio Kannavaro shogirdlari bundan avvalroq JCH mezbonlaridan biri — Kanada terma jamoasiga qarshi nazorat o‘yinida maydonga tushgan edi. Mazkur bahsda vakillarimiz raqibga 0:2 hisobida imkoniyatni boy berib qo‘yishgandi. Niderlandiya bilan o‘yin Kannavaro uchun xatolarni to‘g‘rilash va asosiy tarkibni sinab olish uchun so‘nggi imkoniyat vazifasini o‘taydi.
Eslatib o‘tamiz, O‘zbekiston milliy terma jamoasi o‘z tarixidagi ilk Jahon chempionati guruh bosqichidagi debyut uchrashuvini Kolumbiyaga qarshi o‘tkazadi. Ushbu uchrashuv 18-iyun kuni Toshkent vaqti bilan soat 08:00 daboshlanadi.
