O‘zbekistonning jahon chempionatidagi raqibi FIFA qarori bilan o‘zgarishi mumkin. Nigeriya futbol federatsiyasi DR Kongoga qarshi norozilik shikoyati kiritdi. Ushbu mojaro natijasiga ko‘ra, Fabio Kannavaro shogirdlarining guruhdagi to‘rtinchi raqibi nomi yangilanishi ehtimoli bor.
Futbol bo‘yicha jahon chempionati starti arafasida O‘zbekiston terma jamoasi joy olgan guruh tarkibida o‘zgarish yuz berishi ehtimoli yuzaga keldi. Nigeriya futbol federatsiyasi FIFAga rasmiy norozilik bildirib, DR Kongo terma jamoasi safida qoidalarga zid ravishda o‘yinchilar maydonga tushirilganini da’vo qilmoqda. Shikoyatda ta’kidlanishicha, Yevropa pasportiga ega bo‘lgan ayrim kongolik futbolchilar mamlakat qonunchiligiga ko‘ra fuqarolikdan mahrum bo‘lishi kerak edi, bu esa ularning terma jamoada o‘ynashini noqonuniy qiladi.
Hozirda ushbu ish FIFA intizom qo‘mitasi tomonidan o‘rganilmoqda. Natijadan kelib chiqib, «K» guruhidagi to‘rtinchi jamoa (Yamayka, Yangi Kaledoniya, DR Kongo yoki Nigeriya g‘olibi) nomi o‘zgarishi mumkin. Eslatib o‘tamiz, Portugaliya va Kolumbiya bilan bir guruhdan joy olgan Fabio Kannavaro shogirdlari o‘zining ilk uchrashuvini 17-iyun kuni Mexikoda o‘tkazadi. Biroq FIFA yakuniy xulosani e’lon qilmaguncha, guruh tarkibi to‘liq tasdiqlangan hisoblanmaydi.
