O‘zbekistonda ish haftasi yakunigacha havo harorati +32 darajagacha ko‘tariladi. O‘zgidromet ayrim hududlarda yomg‘ir va chang-to‘zonlar bo‘lishidan ogohlantirdi.
O‘zgidromet xizmati agentligi xabariga ko‘ra, respublikaning aksariyat viloyatlarida yog‘ingarchilik kutilmaydi, biroq ayrim hududlarda qisqa muddatli yomg‘ir va momoqaldiroq bo‘lishi mumkin.
Xususan, 26-mart kuni va 27-martga o‘tar kechasi Buxoro va Navoiy viloyatlarida, shuningdek, tog‘oldi hamda tog‘li tumanlarda qisqa muddatli yog‘ingarchilik kuzatiladi. Baland tog‘li hududlarda yomg‘ir qorga aylanishi ehtimoli bor. Respublika bo‘ylab havo harorati kechalari +10…+15 darajani tashkil etsa, kunduzi termometr ko‘rsatkichi +23…+28 darajagacha ko‘tariladi. Mamlakatning shimoliy va janubiy cho‘l zonalarida esa ayrim kunlari issiq +30…+32 darajagacha yetadi. Shuningdek, ba’zi joylarda shamol tezligi soniyasiga 13–18 metrgacha kuchayib, chang-to‘zonlar kuzatilishi mumkin.
Poytaxtda esa hafta oxirigacha yog‘ingarchilik kutilmaydi. Toshkentda 24–26-mart kunlari havo harorati kunduzi +23…+26 daraja atrofida bo‘lsa, 27-martga kelib issiq +27…+29 darajagacha ko‘tariladi. Kechalari harorat +10…+15 daraja iliq bo‘lishi kutilmoqda.
