Prezident farmoni bilan qarzdorlik sabab elektr va gazdan uzilgan iste’molchilardan qayta ulanish uchun qo‘shimcha to‘lov undirish tartibi bekor qilindi.
Qayta ulanish to‘lovining bekor qilinishi
O‘zbekistonda qarzdorlik sababli elektr energiyasi yoki tabiiy gaz tarmog‘idan uzilgan iste’molchilarni qayta ulash uchun olinadigan qo‘shimcha to‘lov bekor qilindi. Ushbu yengillik Prezidentning 23-sentabrda kuchga kirgan farmoni bilan joriy etildi.
Yangi tartibga ko‘ra, maishiy iste’molchilardan BHMning 2 baravari (880 ming so‘m), yuridik shaxslardan esa BHMning 10 baravari (4,4 mln so‘m) miqdorida talab etib kelingan qayta ulanish yig‘imi endilikda undirilmaydi.
Tabaqalashtirilgan tariflar va issiqxona xo‘jaliklariga imtiyozlar
Hujjat bilan energetika sohasidagi hisob-kitob tizimiga ham bir qator o‘zgartirishlar kiritildi:
-
Tabaqalashtirilgan tariflar: Ulangan quvvati 750 kVA va undan ortiq bo‘lgan yirik iste’molchilar uchun tungi davrda (22:00–06:00) qo‘llanilgan 1,5 baravar kamaytiruvchi koeffitsiyent bekor qilindi. Endilikda ushbu 1,5 kamaytiruvchi koeffitsiyent yarim tig‘iz davrda (09:00–17:00) qo‘llaniladi.
-
Issiqxona xo‘jaliklari: Qarzdorligi bo‘lmagan issiqxonalar uchun oktyabr-mart oylarida yetkazib beriladigan tabiiy gaz uchun 50 foiz oldindan to‘lov tartibi belgilandi (qolgan qismi oy yakunida to‘lanadi). Keyingi oylardan e’tiboran 100 foizlik oldindan to‘lov tizimi saqlanadi.
Raqobat qo‘mitasining ta’kidlashicha, yangi tartib iste’molchilar manfaatlarini muhofaza qilish va ortiqcha xarajatlarning oldini olishga qaratilgan. Shuningdek, hujjatda elektr uzilishlari muddatida bartaraf etilmagan taqdirda iste’molchilarga kompensatsiya to‘lash mexanizmini joriy etish ko‘zda tutilgan.
Izohlar
Hozircha izohlar yo‘q