O‘zbekistonda dam olish kunlaridan boshlab ob-havo keskin soviydi. Yomg‘ir yog‘ib, shamol kuchayishi, baland tog‘larda qor yog‘ishi kutilmoqda.
Sovuq havo massalari kirib kelishi va yog‘ingarchilik
“O‘zgidromet” dam olish kunlaridan e’tiboran mamlakat hududida ob-havo sharoiti keskin o‘zgarishi haqida ogohlantirish berdi.
Prognozlarga ko‘ra, 3-oktyabr kuni O‘zbekistonning shimoliy hududlariga, 4—5-oktyabr kunlari esa respublikaning qolgan barcha hududlariga sovuq va nam havo massalari kirib keladi.
3—4-oktyabrda shimolda va cho‘l hududlarida, 4—5-oktyabr kunlari esa boshqa hududlarda yomg‘ir yog‘adi. Ba’zi joylarda yog‘ingarchilik kuchli bo‘lishi, baland tog‘li hududlarda esa qorga aylanishi kutilmoqda.
Havo harorati asta-sekin pasayib, kunduz kunlari 15–20 daraja, kechalari 5–10 daraja iliq bo‘ladi. Shimoliy hududlarda esa kunduzi 12–17 daraja, kechasi 2–7 daraja iliq gacha tushadi.
3—4-oktyabr kunlari ba’zi joylarda shamol tezligi 13–18 m/s gacha, ayrim hududlarda esa chang-to‘zon bilan 20–22 m/s gacha kuchayishi mumkin.
