Oliy Majlis Qonunchilik palatasining majlisida deputat Gulruh Agzamova 14 yoshga yetmagan shaxslarni zorlash holatlari bo‘yicha 2022-yilda 85 ta, 2023-yilda 108 ta, 2024-yilda 129 ta va 2025-yilda 123 ta jinoyat ishi qo‘zg‘atilgan statistik ma’lumotlarni ochiqladi. Oxirgi to‘rt yil ichida ushbu modda bo‘yicha jami 445 ta jinoyat ishi ochilgan.
Bolalarga nisbatan zoravonlik statistikasi va Namangandagi mudhish voqea
Ushbu raqamlar bolalarni zo‘ravonlikning barcha shakllaridan himoya qilish tizimini takomillashtirishga qaratilgan qonun loyihasi muhokamasi chog‘ida keltirildi. Deputat Namanganda sodir bo‘lgan mudhish voqea hech kimni befarq qoldirmaganini ta’kidlab, bolalarga nisbatan og‘ir jinsiy zo‘ravonlik sodir etgan shaxslarga nisbatan jinoiy javobgarlikni keskin kuchaytirish zarurligini uqtirdi.
Uning ta’kidlashicha, bugun shunchaki navbatdagi hujjat emas, balki jamiyatda bolalarning xavfsizligi va ularning ertangi kuniga bo‘lgan ishonchi muhokama qilinmoqda.
Bosh vazirga parlament so‘rovi va pedofillar reyestri nazorati
Mazkur qonun loyihasi muhokamasi fonida Bosh vazirga bolalarni zo‘ravonlikdan himoya qilish bo‘yicha amalga oshirilgan ishlar yuzasidan senat so‘rovi yuborildi.
Hujjatda zo‘ravonlik jinoyatlarini sodir etgan shaxslarning maxsus reyestridan foydalanish ahvoli hamda ularning voyaga yetmaganlar bilan ishlaydigan tashkilotlarga ishga kirib qolish holatlari bo‘yicha aniq ma’lumotlar so‘ralgan. Shuningdek, hukumatdan ushbu yo‘nalishdagi tizimli muammolarni bartaraf etish bo‘yicha ko‘rilayotgan choralar haqida hisobot berish talab qilingan.
