O‘zbekiston 2026-yilgi jahon Baxt reytingida 53-o‘rinni egalladi. Qo‘shni davlatlar ko‘rsatkichlari va reyting qanday shakllanishi haqida tafsilotlar.
Yangi reytingda O‘zbekiston 147 ta davlat orasida 53-pog‘onadan joy oldi. Mamlakatimiz ushbu ko‘rsatkich bilan mintaqadagi bir qancha qo‘shni davlatlarni ortda qoldirib, barqaror o‘sish sur’atlarini namoyish etdi.
Mintaqaviy tahlil shuni ko‘rsatadiki, qo‘shni Qozog‘iston ro‘yxatda 33-o‘rinni band etgan. Qirg‘iziston 66-pog‘onada, Rossiya 79-o‘rinda, Tojikiston esa 88-o‘rinda qayd etilgan. Dunyoning eng baxtli mamlakati maqomini yana bir bor Finlyandiya o‘zida saqlab qoldi. Reytingning eng quyi qismidan esa Afg‘oniston joy olgan bo‘lib, u dunyodagi eng «baxtsiz» davlat deb topildi.
Mazkur tadqiqot yetti xil asosiy omilga tayanib tayyorlanadi. Mutaxassislar aholi jon boshiga to‘g‘ri keladigan YaIM miqdori bilan bir qatorda, ijtimoiy qo‘llab-quvvatlash tizimi, sog‘liqni saqlash sifati va fuqarolarning tanlov erkinligini ham hisobga oladilar. Shuningdek, jamiyatdagi o‘zaro yordam, korrupsiya darajasi va odamlarning hayotdan umumiy mamnunlik hissi yakuniy natijaga bevosita ta’sir ko‘rsatadi.
