Navoiy viloyatining Karmana tumanida kattalarning e’tiborsizligi navbatdagi mudhish fojiaga sabab bo‘ldi. 22-aprel kuni soat 21:00 atrofida “Malik” mahallasi hududida Cobalt rusumli avtomobil yo‘ldan chiqib ketib, ag‘darilgan. Mashina salonida 22-sonli umumta’lim maktabining ikki nafar o‘quvchisi bo‘lgan, ulardan biri voqea joyida halok bo‘lgan.
Surishtiruv davomida ma’lum bo‘lishicha, avtomobil 11-sinf o‘quvchisining otasiga tegishli bo‘lgan. Biroq ota mashina boshqaruvini guvohnomasi bo‘lmagan 16 yoshli o‘smirga topshirgan. Mazkur mas’uliyatsizlik oqibatida avtomobilda bo‘lgan 9-sinf o‘quvchisi og‘ir tan jarohatlari olib, vafot etgan. Ikkinchi maktab o‘quvchisi esa turli darajadagi jarohatlar bilan shifoxonaga yotqizilgan.
Navoiy viloyati IIB YHXB ushbu holat yuzasidan ota-onalarni yana bir bor ogohlantirib, voyaga yetmagan shaxslarga transport vositasini ishonib topshirish fojia bilan yakunlanishini ta’kidladi. Hozirda holat yuzasidan tergov harakatlari olib borilmoqda. Farzandining hayotini xavfga qo‘ygan va boshqaruvni huquqi bo‘lmagan shaxsga bergan ota-onalarning mas’uliyati qonun doirasida ko‘rib chiqiladi.
Izohlar
Hozircha izohlar yo‘q