Nurota tumanida bog‘cha bolalarini tashiydigan Matiz halokatga uchradi. 14 nafar bola jarohatlandi, haydovchi vafot etdi. Bir nafar bola koma holatida.
5-may kuni ertalab yuz bergan halokatda 1992-yilda tug‘ilgan ayol Matiz rusumli avtomobilda 13 nafar bog‘cha tarbiyalanuvchisi va o‘zining chaqalog‘ini olib ketayotgan bo‘lgan.
Yangi hayot mahallasi hududida haydovchi boshqaruvni yo‘qotishi natijasida transport vositasi yo‘ldan chiqib ketib ag‘darilgan. Ayol shifoxonada vafot etgan bolalar esa turli darajadagi jarohatlar bilan shifokorlar nazoratiga olingan.
Tibbiy ma’lumotlarga ko‘ra jabrlanganlardan birining ahvoli o‘ta og‘ir bo‘lib u hozirda koma holatida qolmoqda. Sakkiz nafar bola viloyat shifoxonasiga o‘tkazilgan.
Surishtiruvlar davomida haydovchilik guvohnomasiga ega bo‘lmagan ayol va uning turmush o‘rtog‘i yillar davomida bolalarni shu tarzda tashib kelgani ma’lum bo‘ldi. Eng achinarlisi ota-onalar ham bunday xavfli tashish usuliga va haydovchining hujjatlari yo‘qligiga ko‘z yumib kelishgan. Hozirda holat yuzasidan huquq-tartibot idoralari tomonidan tergov harakatlari olib borilmoqda.
