11-may kuni yuqori sinf o‘quvchilari uchun darslar bo‘ladi, bog‘chalar va boshlang‘ich sinflar dam oladi. Dam olish kuni ko‘chirilishi hamma o‘quvchilarga taalluqli emas.
Umumta’lim maktablarining yuqori sinf o‘quvchilari uchun 11-may, dushanba kuni odatdagidek dars mashg‘ulotlari o‘tkaziladi. Biroq boshlang‘ich sinf o‘quvchilari hamda davlat maktabgacha ta’lim tashkilotlari tarbiyalanuvchilari uchun ushbu kun dam olish kuni deb e’lon qilindi. Nodavlat ta’lim muassasalari esa ichki tartib qoidalaridan kelib chiqqan holda dam olish kunlarini mustaqil belgilashlari mumkin.
Ushbu tartib Xotira va qadrlash kuni munosabati bilan qabul qilingan prezident farmoniga asoslanadi. 2026-yilda 9-may shanba kuniga to‘g‘ri kelgani sababli, besh kunlik ish haftasidagi dam olish kuni 11-mayga ko‘chirilgan edi.
Shunga qaramay, yuqori sinflarda o‘quv dasturlarini o‘z vaqtida yakunlash zaruriyati tufayli ta’lim jarayoni to‘xtatilmaydi. Kichik yoshdagi bolalar va bog‘cha tarbiyalanuvchilari uchun esa dushanba dam olish kuni bo‘lib qoladi va ular 12-maydan o‘qishga qaytadilar.
Izohlar
Hozircha izohlar yo‘q