Toshkent viloyatida voyaga yetmagan o‘quvchisiga shilqimlik qilgan maktab direktori ustidan sud hukmi o‘qildi. U o‘zining uyatsiz xabarlarini «tarbiya berish» bilan oqlamoqchi bo‘lgani uchun 5 sutka qamoq jazosini oldi.
Toshkent viloyati O‘rtachirchiq tumanida voyaga yetmagan o‘quvchisiga nisbatan shahvoniy mazmunda xabarlar yuborgan maktab direktori jazoga tortildi. 39 yoshli muassasa rahbari J.I. aprel oyi o‘rtalarida Telegram messenjeri orqali o‘z o‘quvchisiga nisbatan axloqsiz takliflar va shahvoniy mazmundagi SMSlar yuborgani tasdiqlandi. Ushbu holat yuzasidan qo‘zg‘atilgan ma’muriy ish tuman sudida ko‘rib chiqildi.
Sud majlisi davomida J.I. barcha ayblarni tan olib, o‘z qilmishini oqlash uchun g‘alati vaj keltirdi. Uning so‘zlariga ko‘ra, u o‘quvchi qizga bunday xabarlarni go‘yoki «tarbiya berish maqsadida» yozgan ekan. Biroq jabrlanuvchi tomon ushbu vajlarni rad etib, pedogogik etika va qonunni buzgan shaxsning maktabda ishlashi xavfli ekanini ta’kidladi. O‘rtachirchiq tumani sudi direktorning «tarbiyaviy» bahonalarini inobatga olmay, uni Ma’muriy javobgarlik to‘g‘risidagi kodeksning 41-1-moddasi bilan aybdor deb topdi va 5 sutka ma’muriy qamoq jazosini tayinladi.
