Navoiy viloyatining Karmana tumani hokimi Shoxrux Boltayev 9-sonli maktab o‘qituvchilarni hokimiyatga chaqirib, ularni 1 soat turg‘izib qo‘ydi. Ko‘pchiligi ro‘zador bo‘lgan o‘qituvchilar bir soat davomida tik turishga majbur bo‘lgan.
Navoiy viloyatining Karmana tumanida hokim Shoxrux Boltayev va 9-sonli maktab pedagoglari o‘rtasida ziddiyatli vaziyat yuzaga keldi. 12-mart kuni tuman hokimi Hazora qishlog‘idagi ushbu ta’lim muassasasiga tashrif buyurib, o‘quvchilar va o‘qituvchilarning bilim saviyasini shaxsan tekshirgan. Hokimning iddao qilishicha, o‘quvchilar she’r aytib berish va bazaviy savollarga javob berishda qiynalgan.
Ta’lim sifatidan qoniqmagan hokim 46 nafar o‘qituvchini tuman markaziga — hokimiyat binosiga keltirishni buyurgan. Qishloqdan tuman markazigacha bo‘lgan 30 kilometrlik yo‘lni bosib o‘tgan pedagoglarning aksariyati ayollar bo‘lib, ularning ko‘pchiligi o‘sha kuni ro‘zada bo‘lgan. O‘qituvchilarning so‘zlariga ko‘ra, hokimiyatga yetib kelgach, ular yarim soat davomida kutishga majbur bo‘lishgan. Shundan so‘ng bo‘lib o‘tgan majlis taxminan bir soat davom etgan va bu vaqt mobaynida ularga o‘tirishga ruxsat berilmagan.
Shoxrux Boltayev ushbu uchrashuv o‘tkazilganini tasdiqlab, buni ta’lim sifatini oshirish zarurati bilan izohladi. Hokim bitiruvchilarning oliy o‘quv yurtlariga kirish ko‘rsatkichi so‘nggi yillarda 50 foizdan oshmayotganidan noroziligini bildirdi. Uning ta’kidlashicha, suhbat bor-yo‘g‘i 10 daqiqa davom etgan.
Maktab jamoasi esa hokimning ma’lumotlariga qo‘shilmasligini bildirdi. Pedagoglarning qayd etishicha, so‘nggi uch yil ichida bitiruvchilarning oliy ta’limga kirish ko‘rsatkichi 65–70 foizni tashkil etgan.
Hokim tuman maktabgacha va maktab ta’limi bo‘limi vakillaridan maktabda navbatdan tashqari tekshiruv o‘tkazishni talab qildi. Shuningdek, u maktab direktor o‘rinbosarlaridan ishdan bo‘shash to‘g‘risida ariza yozishni talab qilgani aytilmoqda.
