Farg‘ona viloyatida joriy yilning 8–12-iyun kunlari bolalar uchun bepul tibbiy ko‘rik va murakkab operatsiyalar o‘tkaziladi. Tadbir Farg‘ona viloyati Bolalar ko‘p tarmoqli tibbiyot markazida bo‘lib o‘tadi.
Ushbu xayriya tadbiri bolalar salomatligini mustahkamlash, ularga yuqori malakali tibbiy yordam ko‘rsatish hamda murakkab kasalliklarga chalingan bemor bolalarni qo‘llab-quvvatlash maqsadida o‘tkazilmoqda.
Zamonaviy diagnostika va bepul jarrohlik amaliyotlari Tibbiy aksiya doirasida respublikaning eng yetakchi shifokorlari va tor soha mutaxassislari tomonidan bolalar uchun bepul tibbiy ko‘rik hamda konsilium-maslahatlar tashkil etiladi.
Shuningdek, tadbir davomida quyidagi tibbiy xizmatlar ko‘rsatilishi rejalashtirilgan:
-
Zamonaviy yuqori texnologik diagnostika tekshiruvlari;
-
Davolash muolajalari;
-
Zarur hollarda, murakkab jarrohlik amaliyotlarini bepul amalga oshirish.
Bundan tashqari, yetakchi mutaxassislar ota-onalar bilan suhbatlashib, bolalarda uchraydigan turli surunkali va tug‘ma kasalliklarning oldini olish, sog‘lom turmush tarzini shakllantirish bo‘yicha zarur tavsiyalarni berishadi.
Tashkilotchilarning ta’kidlashicha, ushbu xayriya aksiyasidan ko‘zlangan asosiy maqsad chekka hududlardagi bolalarning ham sog‘lig‘ini tiklashga ko‘maklashish va ularning sog‘lom kelajagiga hissa qo‘shishdan iborat.
