Dam olish kunlari O‘zbekistonda momaqaldiroqli yomg‘irlar yog‘ishi va tog‘li hududlarda sel kelish xavfi kutilmoqda. Toshkentda havo harorati +24 darajagacha ko‘tarilib, chang-to‘zonlar kuzatilishi mumkin.
Kelayotgan dam olish kunlarida O‘zbekistonning aksariyat hududlarida bahorgi beqaror ob-havo kuzatilishi kutilmoqda. Sinoptiklarning ma’lum qilishicha, respublika bo‘ylab vaqti-vaqti bilan yomg‘ir yog‘ib, momaqaldiroq bo‘lishi ehtimoli yuqori. Yog‘ingarchiliklar asosan markaziy va sharqiy viloyatlarni qamrab oladi, shimoliy hududlarda — Qoraqalpog‘iston, Xorazm va Navoiy viloyatining bir qismida esa quruq ob-havo saqlanib qoladi. Buxoro va Navoiy viloyatlarining janubida yomg‘ir faqat ayrim joylarda qisqa muddatli ko‘rinishda bo‘lishi mumkin. Kunduzi havo harorati +22…+25 daraja atrofida bo‘ladi, ammo shimoli-g‘arbda yakshanba kuniga kelib harorat keskin ko‘tarilib, +30 darajagacha yetishi prognoz qilinmoqda.
Mutaxassislar tog‘ oldi va tog‘li hududlarda yashovchi aholi hamda sayyohlarni alohida ehtiyotkorlikka chaqirmoqda. Kuchli yomg‘irlar sababli ushbu hududlarda sel-suv toshqinlari yuzaga kelish xavfi mavjud. Poytaxtimizda ham ob-havo o‘zgaruvchan bo‘lib, vaqti-vaqti bilan yomg‘ir yog‘ishi va momaqaldiroq bo‘lishi mumkin. Toshkentda harorat kechasi +13…+15, kunduzi esa +22…+24 darajani tashkil etadi. Shuningdek, shamol tezligi soniyasiga 12 metrgacha kuchayib, ayrim joylarda chang-to‘zonlar ko‘tarilishi ehtimoli bor. O‘zgidromet xizmati aholidan ob-havoning kutilmagan o‘zgarishlariga tayyor turishni va xavfsizlik choralariga amal qilishni so‘rab qoladi.
