O‘zgidromet dam olish kunlari respublika bo‘ylab anomal issiq bo‘lishidan ogohlantirdi. Yakshanba kuni poytaxtda va ayrim viloyatlarda momaqaldiroqli yomg‘ir hamda chang-to‘zonlar kuzatilishi ehtimoli bor.
Aprel oyining oxirgi dam olish kunlari O‘zbekiston hududida havo haroratining sezilarli darajada ko‘tarilishi bilan yodda qoladi. Sinoptiklarning ma’lum qilishicha, juma kunidan boshlab iliq havo oqimi kirib kelishi natijasida kunduzgi harorat +27 darajaga yetadi, janubiy hududlarda esa +32 darajagacha issiq bo‘ladi. Shanba kuni respublika bo‘ylab issiq havo o‘z cho‘qqisiga chiqadi: aksariyat viloyatlarda +31 daraja, janub va cho‘l zonalarida esa +35 darajagacha issiq qayd etiladi. Faqat vodiy viloyatlari va Qoraqalpog‘istonning shimoliy qismida qisqa muddatli yog‘ingarchilik kuzatilishi mumkin.
26-aprel, yakshanba kuni mamlakatning katta qismida issiq ob-havo saqlanib qolsa-da, shimoliy-g‘arbiy hududlarda haroratning pasayishi kutilmoqda. Xususan, Xorazm va Qoraqalpog‘istonda kunduzi +20…+23 daraja atrofida iliq bo‘ladi. Buxoro va Navoiy viloyatlarida ham harorat biroz pasayib, +28 darajadan oshmaydi. Shuningdek, dam olish kunlari respublika bo‘ylab shamol kuchayishi va natijada changli bo‘ronlar ko‘tarilishi ehtimoli yuqori.
Toshkent shahrida shanba kuni havo ochiq va issiq — +30 darajagacha bo‘lishi bashorat qilinmoqda. Yakshanba kunining ikkinchi yarmida esa poytaxt osmonida bulutlar ko‘payib, momaqaldiroq bilan birga qisqa muddatli yomg‘ir yog‘ishi mumkin. Kechki payt shamolning tezligi 12 m/s gacha kuchayishi kutilmoqda. Kechalari havo harorati nisbatan barqaror bo‘lib, +14…+17 darajani tashkil etadi.
