Dam olish kunlari O‘zbekiston hududining katta qismida yog‘ingarchiliksiz ob-havo kutilmoqda, kunduzgi harorat 17 darajagacha isishi prognoz qilinmoqda.
Bo‘lajak dam olish kunlari O‘zbekiston aholisini iliq va yoqimli ob-havo kutmoqda. “O‘zgidromet” xabariga ko‘ra, respublika hududida harorat ko‘tarilishi davom etadi, bu esa ochiq havoda dam olish uchun qulay sharoit yaratadi.
Respublikaning ko‘pchilik hududlarida yog‘ingarchiliksiz ob-havo kuzatiladi. Biroq, Buxoro, Navoiy, Qashqadaryo, Surxondaryo va Samarqand viloyatlarida 14-mart kuni kechqurun va 15-mart davomida ba’zi joylarda qisqa muddatli yomg‘ir yog‘ishi ehtimoli bor. Havo harorati asta-sekin ko‘tarilib, hafta oxiriga kelib kunduzi 14–17 daraja iliqni tashkil etadi. Tungi harorat ham ijobiy tomonga o‘zgarib, ko‘pchilik hududlarda 0–5 daraja iliq atrofida bo‘lishi kutilmoqda, ayrim joylarda esa hali ham past harorat va engil sovuq saqlanib qolishi mumkin.
Toshkent shahrida 13–15 mart kunlari yog‘ingarchilik kutilmaydi. Sharqdan esayotgan shamol tezligi soniyasiga 3–8 metrni tashkil etadi. Poytaxtda kunduzgi harorat dam olish kunlari 13–15 daraja iliq, kechasi esa 1 daraja sovuqdan 4 daraja iliqqacha bo‘lishi prognoz qilinmoqda.
