2026-yil 1-apreldan O‘zbekistonda kameralar qayd etgan qoidabuzarliklar uchun jarima ballari hisoblanadi. YHXX mas’uliyatni haqiqiy haydovchiga o‘tkazish tartibini tushuntirdi.
Vazirlar Mahkamasining 25-oktabrdagi qaroriga muvofiq, endilikda ballar nafaqat YHXX inspektorlari tomonidan rasmiylashtirilgan, balki avtomatlashtirilgan tizimlar qayd etgan holatlar uchun ham yoziladi. Ushbu chora yo‘llarda o‘lim holatlarini kamaytirish va xavfsizlikni kuchaytirishga qaratilgan.
YHXX aniqlik kiritishicha, agar qoidabuzarlik sodir etilgan vaqtda rulda avtomobil egasi emas, balki boshqa shaxs (ishonchnoma, sug‘urta polisi yoki yo‘l varaqasi asosida) bo‘lgan bo‘lsa, ballar aynan o‘sha haydovchiga yoziladi. Avtomobil egalari qoidabuzarni aniqlash va jarima ballarini haqiqiy aybdorga o‘tkazish huquqiga ega bo‘ladi.
Joriy etilgan tizim samaradorligi statistik ma’lumotlarda ham aks etmoqda: 2025-yilning to‘qqiz oyi davomida haydovchilar aybi bilan sodir etilgan YTHlar soni 36 foizga, umumiy qoidabuzarliklar esa 58 foizga kamaydi. Hozirda jami qayd etilgan 20,8 million qoidabuzarlikning 75 foizi (15,6 million) aynan kameralar ulushiga to‘g‘ri keladi, bu esa yangi tartibning ahamiyatini yanada oshiradi.
Izohlar
Hozircha izohlar yo‘q