«A-373» avtomobil yo‘lining Angren shahri hududida mudhish YTH yuz berdi. HOWO yuk mashinasi to‘rtta yengil avtomobilga borib urilishi oqibatida ikki kishi vafot etdi, to‘rt kishi jarohatlandi.
31 yoshli haydovchi boshqaruvidagi HOWO rusumli yuk avtomobili harakat davomida nazoratni yo‘qotib, o‘zi bilan bir yo‘nalishda ketayotgan to‘rtta transport vositasiga borib urilgan.
Asosiy zarba yo‘l chetidagi Cobalt avtomobiliga to‘g‘ri kelgan. Ushbu mashina ichida bo‘lgan 51 yoshli haydovchi va 40 yoshli yo‘lovchi olgan og‘ir tan jarohatlari tufayli voqea joyida hayotdan ko‘z yumdi. Shuningdek, to‘qnashuv natijasida zarar ko‘rgan boshqa mashinalardagi to‘rt nafar yo‘lovchi turli darajadagi jarohatlar bilan shifoxonaga yotqizilgan. Ularga zaruriy tibbiy yordam ko‘rsatilmoqda.
Mazkur holat yuzasidan Toshkent viloyati IIBB huzuridagi Tergov boshqarmasi tomonidan Jinoyat kodeksining 266-moddasi 3-qismi «a» bandi (Odamlar o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atildi.
Izohlar
Hozircha izohlar yo‘q