Dunyoga mashhur Minecraft o‘yinining Java Edition talqini uchun chiqarilgan yangi yangilanishda o‘zbek tili rasman joriy etildi.
Mojang studiyasi ishlab chiquvchilari o‘yin interfeysini to‘liq o‘zbek tiliga mahalliylashtirdilar. Endilikda o‘yin menyusi, barcha asbob-uskunalar nomlari va tizimli xabarlar o‘zbek tilida namoyon bo‘ladi.
Bu yangilik mamlakatimizdagi millionlab yosh geymerlar uchun kutilgan sovg‘a bo‘lib o‘yin jarayonini yanada tushunarli va qiziqarli qilishga xizmat qiladi.
O‘zbek tilini faollashtirish uchun o‘yin sozlamalaridagi tillar bo‘limiga kirib tegishli bandni tanlash kifoya. Mutaxassislarning fikricha Minecraft kabi global miqyosdagi ommabop o‘yinda ona tilimizning paydo bo‘lishi raqamli texnologiyalar olamida o‘zbek tilining nufuzi ortib borayotganidan dalolat beradi.
Mazkur qadam maktab yoshidagi bolalarning mantiqiy fikrlash qobiliyatini rivojlantiruvchi ushbu o‘yindan samaraliroq foydalanishiga va til o‘rganish jarayonini o‘yin bilan bog‘lashiga yordam beradi.
Izohlar
Hozircha izohlar yo‘q