O‘zbekistonda ariqlarni ifloslantirish va o‘rmon yerlarida noqonuniy qurilish qilish uchun jazo kuchaytirildi. Yangi jarimalar 28-iyundan kuchga kiradi.
O‘zbekistonda ekologik xavfsizlikni ta’minlash va tabiiy resurslardan oqilona foydalanishni nazorat qilish maqsadida Ma’muriy javobgarlik va Jinoyat kodekslariga muhim o‘zgartishlar kiritildi. Yangi tartibga ko‘ra, aholi punktlaridagi ariqlar va sug‘orish kanallarini chiqindilar bilan to‘ldirish suvdan foydalanish qoidalarini buzishga tenglashtirildi. Bu kabi huquqbuzarlik uchun fuqarolarga 2 million so‘mgacha (5 BHM), mansabdor shaxslarga esa 4 million so‘mdan ortiq (10 BHM) miqdorda jarima solinishi belgilandi.
Shuningdek, daryo o‘zanlarini tozalash va qirg‘oqlarni mustahkamlash ishlaridagi qonunbuzarliklar uchun ham sanksiyalar sezilarli darajada oshirildi. Agarda ushbu qoidalar bir yil ichida takroran buzilsa, mansabdor shaxslar uchun jarima miqdori 123,6 million so‘mgacha (300 BHM) yetishi mumkin. Suv resurslarini ifloslantirganlik uchun fuqarolarga qo‘llaniladigan jarima miqdori esa avvalgi 3–5 barobardan 15–20 barobargacha (6,18–8,24 mln so‘m) ko‘tarildi.
Qonunchilikdagi eng jiddiy yangiliklardan biri — o‘rmon fondi yerlarini noqonuniy o‘zlashtirish va u yerda qurilish ishlarini olib borish bilan bog‘liqdir. Endilikda ma’muriy jazodan so‘ng o‘rmon yerlarida bino yoki inshoot qurgan shaxslar 5 yilgacha, takroran sodir etilganda esa 7 yilgacha ozodlikdan mahrum etilishi mumkin. Shuningdek, o‘simlik dunyosiga zarar yetkazish, xususan, daraxtlarni noqonuniy kesganlik uchun jarimalar miqdori bir necha barobarga oshirilib, 247,2 million so‘mgacha belgilandi. Ushbu yangi tartiblar 2026-yilning 28-iyunidan boshlab rasman kuchga kiradi.
