AQSH Hormuz bo‘g‘ozini xalqaro konsorsium boshqaruviga berishni taklif qildi. Marko Rubio G7 yig‘ilishida erkin kema qatnovi va to‘lovlarning bekor qilinishini talab qildi.
Donald Tramp ma’muriyati dunyo neft yetkazib berish zanjiri uchun strategik ahamiyatga ega bo‘lgan bo‘g‘oz ustidan nazorat o‘rnatish tashabbusi bilan chiqdi. AQSH davlat kotibi Marko Rubio ushbu taklifni «Katta yettilik» (G7) davlatlari tashqi ishlar vazirlari yig‘ilishida taqdim etdi.
Jahon energetika xavfsizligining muhim nuqtasi hisoblangan Hormuz bo‘g‘ozi xalqaro boshqaruvga o‘tkazilishi mumkin. The Daily Telegraph nashrining diplomatik manbalarga tayanib xabar berishicha, AQSH davlat kotibi Marko Rubio ushbu hududda kemalar qatnovi mutlaqo erkin bo‘lishi va hech qanday to‘lovlar undirilmasligini ta’minlash zarurligini ta’kidlagan.
Podrobno.uz nashri qayd etishicha, avvalroq Turkiya, Misr va Saudiya Arabistoni ham bo‘g‘oz orqali o‘tuvchi neft oqimlarini boshqarish bo‘yicha o‘z muqobil rejalarini ilgari surgan edi. Pokistondagi manbalarning tasdiqlashicha, ushbu davlatlarning qo‘shma takliflari ham Oq uyga ko‘rib chiqish uchun yuborilgan. Hormuz bo‘g‘ozi global neft eksportining chorak qismi o‘tadigan asosiy yo‘lak hisoblanadi va uning xalqaro maqomi o‘zgarishi Yaqin Sharqdagi geosiyosiy vaziyatga jiddiy ta’sir ko‘rsatishi kutilmoqda.
