Eron Hormuz bo‘g‘ozi orqali o‘tuvchi tankerlar uchun 2 mln dollar miqdorida haq undirishni rejalashtirmoqda. Rossiya va Xitoy kemalari uchun tranzit bepul qoladi.
Eron hukumati savdo kemalarining Hormuz bo‘g‘ozi orqali o‘tishi uchun majburiy to‘lov tizimini joriy etmoqda. Tegishli qonun loyihasiga ko‘ra, tankerlar va yuk kemalari uchun xavfsizlik hamda boshqa xizmatlar maxsus yig‘imlar hisobiga moliyalashtiriladi. Tehron allaqachon kemalarni ro‘yxatga olish va o‘tish huquqini tasdiqlashning rasmiy tartibini ishga tushirishni rejalashtirgan.
Ma’lumotlarga ko‘ra, 20-martdan boshlab Tehron ayrim tashuvchilar uchun individual tartibda pullik tranzitni qo‘llay boshlagan. Tasdiqlangan operatorlar uchun tashkil etilgan «xavfsiz koridor» narxi har bir o‘tish uchun 2 million dollar atrofida baholanmoqda. Bu chora AQSH va Isroilning Eronga qarshi harbiy amaliyotlari boshlanganidan so‘ng qabul qilindi.
Eslatib o‘tamiz, Hormuz bo‘g‘ozi jahon neft savdosining 20 foizi va suyultirilgan tabiiy gaz (LNG) hajmining 30 foizidan ortig‘ini ta’minlovchi eng muhim nuqta hisoblanadi. 25-mart kuni Tehron «do‘st davlatlar» — Rossiya, Xitoy, Hindiston, Iroq va Pokiston kemalari uchun bepul tranzitga ruxsat bergan edi. Eron TIV rahbari Abbos Aroqchi geosiyosiy vaziyatda mamlakat raqiblariga bo‘g‘ozdan foydalanishga yo‘l berish mantiqsiz ekanini ta’kidladi.
