Toshkent viloyati O‘rta Chirchiq tumanida bir oilaning uch a’zosi, jumladan 17 yoshli o‘smir is gazidan vafot etdi. Prokuratura surishtiruv ishlarini olib bormoqda.
Bosh prokuratura matbuot kotibi Hayot Shamsutdinovning ma’lum qilishicha, bir xonadonda yashovchi uch kishi is gazidan zaharlanish oqibatida vafot etgan. Qurbonlar orasida 79 yoshli ayol, uning 37 yoshli nabirasi hamda 17 yoshli chevarasi (voyaga yetmagan o‘smir) borligi aniqlangan.
Tumanlararo sud-tibbiy ekspertizasining dastlabki xulosalariga ko‘ra, o‘limga yoqilg‘ining to‘liq yonmasligi natijasida hosil bo‘lgan mahsulotlardan (is gazi) o‘tkir zaharlanish sabab bo‘lgan. Mazkur baxtsiz hodisa yuzasidan tuman prokuraturasi tomonidan tergovga qadar tekshiruv harakatlari olib borilmoqda.
Mutaxassislar is gazidan zaharlanishning oldini olish uchun isitish moslamalaridan foydalanishda xavfsizlik qoidalariga qat’iy rioya qilishni, dudburonlar holatini doimiy tekshirib turishni tavsiya qilmoqda.
Izohlar
Hozircha izohlar yo‘q