O‘zbekiston va Qozog‘iston vakillari chegarani ID-karta orqali kesib o‘tish, QazETA tizimidagi imtiyozlar hamda o‘zbekistonliklarni tashkillashtirilgan holda ishga joylashtirish masalalarini muhokama qildi.
O‘zbekiston tashqi ishlar vaziri o‘rinbosari Olimjon Abdullayev Qozog‘iston elchisi Yerali Tugjanov bilan uchrashuv o‘tkazdi. «Dunyo» axborot agentligining xabar berishicha, muzokaralarda fuqarolarning huquq va qonuniy manfaatlarini himoya qilish, o‘zaro safarlarni soddalashtirish hamda mavjud chegara cheklovlarini bartaraf etish masalalari muhokama qilindi.
Muzokaralarning asosiy yo‘nalishlari
Tomonlar qo‘shni davlat hududiga kirish va u yerda bo‘lish tartibini yengillashtirishga qaratilgan bir qator tashabbuslarni ko‘rib chiqdi:
-
ID-kartalar orqali chegaradan o‘tish: ikki davlat vakillari davlat chegarasini xorijga chiqish pasporti o‘rniga ichki ID-kartalar orqali kesib o‘tish imkoniyati yuzasidan fikr almashdi.
-
QazETA tizimidagi imtiyozlar: Qozog‘iston tomonidan joriy etilayotgan kirish ruxsatnomalarining elektron tizimi doirasida O‘zbekiston fuqarolariga muayyan imtiyozlar berish masalasi ko‘rib chiqildi.
-
Mehnat migratsiyasi: o‘zbekistonliklarni Qozog‘istonda tashkillashtirilgan tarzda ishga joylashtirish mexanizmlari, fuqarolarning ikki davlat hududida bo‘lishi uchun yanada qulay sharoitlar yaratish hamda shartnomaviy-huquqiy bazani takomillashtirish masalalari muhokama qilindi.
Uchrashuv yakunida tomonlar belgilangan yo‘nalishlar bo‘yicha muloqotni davom ettirish va amaliy hamkorlikni rivojlantirishdan manfaatdor ekanliklarini bildirdi.
Izohlar
Hozircha izohlar yo‘q