O‘zbekistonda yaylovlardan foydalanish va pichan o‘rish uchun pullik chiptalar joriy etildi

O‘zbekistonda yaylov yerlaridan foydalanish tartibiga aniqlik kiritildi. Maxsus hududlarda chorva o‘tlatish va pichan o‘rish uchun pullik «yaylov chiptasi» olish talab etiladi.

O‘zbekistonda yaylovlardan foydalanishning amaldagi qoidalari yuzasidan rasmiy tushuntirish berildi. Bunga ijtimoiy tarmoqlarda endi barcha fuqarolar hatto uyidagi chorva mollari uchun oddiy o‘t o‘rishga ham maxsus chipta sotib olishga majbur bo‘lishi haqidagi xabarlar keng tarqalgani sabab bo‘ldi. Qayd etilishicha, pullik «yaylov chiptasi»ni rasmiylashtirish tartibi haqiqatan ham mavjud, biroq bu talab faqat qat’iy belgilangan yer toifalari va faoliyat turlariga nisbatan qo‘llaniladi.

Nima uchun va qachon chipta sotib olish kerak

Amaldagi qoidalarga ko‘ra, respublikadagi yaylov yerlaridan foydalanish qat’iy me’yorlar asosida tartibga solinadi.Ayrim yaylov maydonlari jismoniy va yuridik shaxslarga ijara huquqi asosida ajratiladi hamda bunday yerlardan foydalanganlik uchun belgilangan miqdorda to‘lov undiriladi.

Tartibga solinadigan yaylov hududlarida quyidagi faoliyat turlari uchun ruxsatnoma («yaylov chiptasi») olish va mavsumiy muddatlarga rioya qilish talab etiladi:

• Chorva mollarini o‘tlatish: yaylovlarning degradatsiyaga uchrashining oldini olish maqsadida mol bosh soni me’yorlariga amal qilish.

• Pichan o‘rish: maxsus ajratilgan yoki muhofaza etiladigan yaylov maydonlarida belgilangan hajm va muddatlarda yem-xashak tayyorlash.

• Ijara asosida foydalanish: shartnoma asosida ajratilgan yaylov yerlaridan maqsadli foydalanish.

Talab kimlarga tatbiq etilmaydi

Shu bilan birga, mutaxassislar tarmoqlarda tarqalgan xabarlar noto‘g‘ri talqin qilinayotganini ta’kidladi. Mazkur tartib barcha fuqarolar endi o‘z xonadonidagi chorva mollari uchun o‘t o‘rishga albatta chipta sotib olishi shartligini anglatmaydi.

Pullik chipta olish talabi faqatgina maxsus ajratilgan, ijaraga berilgan yoki davlat hisobidagi yaylov hududlarida chorva boqish va belgilangan me’yorlar asosida pichan o‘rish bilan shug‘ullanuvchi shaxslarga tegishlidir.