Toshkent shahrining Yashnobod tumanida joylashgan pivo ishlab chiqarish korxonasi hududida yong‘in sodir bo‘ldi. Bu haqda poytaxt FVB matbuot xizmati xabar berdi.
Tuzel-1 massividagi yong‘in haqida xabar 10-sentabr kuni soat 15:00 atrofida kelib tushgan. Voqea joyida pivo saqlashga mo‘ljallangan katta sig‘im yonib ketgani aniqlangan.
FVV xodimlari zudlik bilan yong‘inni o‘chirishga kirishib, soat 15:24 da olovni to‘liq bartaraf etgan.
Hodisa oqibatida hech kim jabrlanmagan. Yong‘in pivo saqlanadigan bo‘sh rezervuarning qopqog‘ini zararlagan. Yong‘in sabablari va moddiy zarar miqdori aniqlanmoqda.
