Toshkent transport inqirozi iqtisodiyotga 343 million dollar zarar keltirmoqda, bu esa poytaxt yalpi hududiy mahsulotining 1,27 foiziga tengdir.
Mutaxassislar ushbu yo‘qotishlarni samarasiz logistika uchun to‘lanayotgan «yashirin soliq» deb atamoqdalar. Asosiy zarar vaqt yo‘qotilishi bilan bog‘liq bo‘lib, tirbandliklar tufayli aholi har bir kilometr yo‘lda o‘rtacha bir yarim daqiqa ortiqcha vaqt sarflashga majbur bo‘lmoqda.
Inqirozning ildizi yo‘l infratuzilmasiga uzoq vaqt davomida yetarli sarmoya kiritilmaganiga borib taqaladi. Hozirda poytaxtdagi asosiy magistral yo‘llarning 90 foizi, ya’ni 411 kilometr yo‘l qismi ta’mirga muhtoj. Shahar yo‘llaridagi kundalik transport oqimi 770 ming donani tashkil etib, bu loyihaviy quvvatdan ikki baravar ko‘pdir. Vaziyatni har yili avtoparkning 110 mingtaga ko‘payishi va har kuni shaharga viloyatlardan 1,5 million kishi kirib kelishi yanada og‘irlashtirmoqda.
Muammoning yechimi sifatida shahar ma’muriyati jamoat transportini ustuvor yo‘nalishga aylantirish va shaxsiy avtomobillardan foydalanishni kamaytirishni rejalashtirmoqda. Iqtisodiy zarardan tashqari, tirbandliklar ekologik muammolarni ham keltirib chiqarmoqda: havoga yiliga 3 ming tonna zaharli PM 2.5 zararrchalari tashlanmoqda. Shuningdek, o‘tgan yili qayd etilgan 1 225 ta yo‘l-transport hodisasi nafaqat inson salomatligiga xavf solmoqda, balki shahar budjeti uchun qo‘shimcha xarajatlarni yuzaga keltirmoqda.
