O‘zbekistonda avtotransport vositalaridabolalar xavfsizligini ta’minlash talablari tubdan qayta ko‘rib chiqilmoqda. Yo‘l harakati xavfsizligi xizmati (YHXX) tomonidan amaldagi Yo‘l harakati qoidalaridagi (YHQ) bolalar tashish bilan bog‘liq bo‘shliqlarni bartaraf etishga qaratilgan yangi qaror loyihasi ishlab chiqildi.
Hujjat matniga ko‘ra, bolalarni mashinada tashish tartibi ikki yosh toifasiga ajratiladi va salondagi bolalar soniga qat’iy cheklovlar qo‘yiladi:
-
7 yoshgacha bo‘lgan bolalar (Majburiy avtokreslolar): Ushbu yoshdagi bolalarni engil avtomobillarda tashishga faqat ularning vazni va bo‘yiga mos keladigan maxsus bolalar ushlab turuvchi qurilmalari (avtokreslo, buster) bo‘gandagina ruxsat beriladi.
-
7 yoshdan 16 yoshgacha bo‘lgan bolalar (Xavfsizlik kamarlari): Mazkur yoshdagi bolalar va o‘smirlar avtomobil harakatlanayotgan vaqtda majburiy tartibda shtatdagi xavfsizlik kamarlarini taqib olishlari shart (ham oldingi, ham orqa o‘rindiqlarda).
-
Me’yordan ortiq bola tashishni taqiqlash: Avtomobilda texnik xususiyatlar va o‘rindiqlar sonidan ortiqcha miqdorda bola tashiganlik uchun alohida ma’muriy javobgarlik joriy etish taklif qilinmoqda (bolalarni kattalarning tizzasiga o‘tqizib tashish amaliyoti qonunbuzarlik deb baholanadi).
Amaldagi YHQga ko‘ra, 12 yoshga to‘lmagan bolalarni maxsus qurilmalarsiz engil avtomobilning oldingi o‘rindig‘ida tashish taqiqlangan edi, biroq orqa o‘rindiqda bolalarni tashish tartibi shu paytgacha aniq belgilab qo‘yilmagan edi.
Urbanistika va xavfsizlik sohasi ekspertlarining ta’kidlashicha, xususiy mashinalarda va taksi xizmatlarida bolalar o‘rindiqlaridan foydalanish majburiyati yo‘qligi respublikada YTH vaqtida bolalar o‘limi va og‘ir jarohatlarining yuqori darajada qolayotganiga asosiy sabablardan biri bo‘lib kelayotgan edi.
Loyiha muhokamasi yakunlangach, Vazirlar Mahkamasi tomonidan yangi qoidalar va jarima miqdorlari tasdiqlanishi kutilmoqda.
