Ijtimoiy tarmoqlarda Toshkent metrosi vagonida tutun chiqayotgani aks etgan video tarqaldi. Metro ma’muriyati vaziyatga oydinlik kiritib, yo‘lovchining telefoni nosozlik sabab tutaganini ma’lum qildi.
Kadrlarda vagon polida qandaydir elektron qurilma kuchli tutayotgani, yo‘lovchilar esa sarosimaga tushayotgani aks etgan. Tarmoq foydalanuvchilari jazirama issiq tufayli poyezd simlari qizib ketganidan tortib, «poverbank portladi» degan taxmingacha bo‘lgan versiyalarni ilgari surishdi.
Metropoliten matbuot xizmati holatga rasmiy munosabat bildirib, vaziyat unchalik vahimali emasligini, ammo baribir yoqimsiz voqea yuz berganini ma’lum qildi.
Hodisa yakshanba kuni, 7-iyun kuni taxminan soat 09:15 larda yerusti liniyasining “Roxat” va “Olmos” bekatlari oralig‘ida harakatlanayotgan poyezdda yuz bergan.
Dastlabki ma’lumotlarga ko‘ra, yo‘lovchilardan biriga tegishli bo‘lgan mobil qurilmada texnik nosozlik yuzaga kelgan va u to‘satdan tutay boshlagan.
Shundan so‘ng xavfni sezgan yo‘lovchi gadjetni darhol vagon poliga tashlagan. Keyingi bekatning o‘zidayoq metro xodimlari vagon ichiga kirib, vaziyatni nazoratga olishgan va xavfli buyumni tarkibdan olib chiqib ketishgan.
Baxtimizga, hodisadan hech kim jabrlanmadi. Metropoliten ma’muriyati ushbu holat poyezdlar harakati xavfsizligiga mutlaqo ta’sir ko‘rsatmaganini va yo‘lovchilar uchun jiddiy xavf tug‘dirmaganini bildirdi. Poyezdlar jadvaldan kechikmasdan, odatiy tartibda harakatlanishda davom etgan.
Izohlar
Hozircha izohlar yo‘q