Poytaxt bojxonachilari va Davlat xavfsizlik xizmati vakillari hamkorligida yirik miqdordagi tilla taqinchoqlarning mamlakatdan yashirincha olib chiqilishining oldi olindi. Kontrabanda ashyolari ashyoviy dalil sifatida olib qo‘yildi.
Toshkent xalqaro aeroportida bojxona xodimlari ikki nafar yo‘lovchi ayol tomonidan 720 million so‘mlik zargarlik buyumlarini noqonuniy olib chiqishga qilingan urinishni fosh etdi. Voqea poytaxtdan Istanbul shahriga uchib ketishi rejalashtirilgan yo‘lovchilar bojxona nazoratidan o‘tayotgan vaqtda sodir bo‘ldi.
Huquqni muhofaza qiluvchi organlar vakillari ayollarning shubhali xatti-harakatlariga e’tibor qaratib, ularni chuqurlashtirilgan ko‘rikdan o‘tkazishdi. Natijada, qonunbuzarlar qimmatbaho metallarni yashirish uchun o‘ta xavfli va murakkab usullardan foydalangani aniqlandi — taqinchoqlarning bir qismi hatto tana ichiga yashirilgan holda olib o‘tilmoqchi bo‘lingan.
Tekshiruv davomida aniqlanishicha, birinchi fuqaroning yonidan 252 gramm, ikkinchisinikidan esa 158 gramm tilla buyumlar topilgan. Shuningdek, ularning qo‘l yuklari orasidan bojxona deklaratsiyasida ko‘rsatilmagan qo‘shimcha 64 gramm zargarlik mahsulotlari ham musodara qilindi.
Jami kontrabanda og‘irligi 470 grammdan oshgan. Ekspertlar xulosasiga ko‘ra, ushlab qolingan oltin buyumlarning umumiy qiymati 720 million so‘mni (taxminan 60 ming AQSh dollari) tashkil etadi. Hozirgi vaqtda holat yuzasidan tegishli surishtiruv ishlari olib borilmoqda.
Izohlar
Hozircha izohlar yo‘q