Toshkent issiqlik elektr markazidagi nosozlik tufayli shaharning bir nechta tumanlarida va metropolitenning uchta liniyasida chiroq o‘chdi. Nosozlik tezda bartaraf etildi.
Bugun, 4-iyun kuni soat 12:41 larda Toshkent issiqlik elektr markazi (IEM) transformatorida nosozlik yuzaga keldi. Bu haqda Energetika vazirligi matbuot xizmati xabar berdi.
Texnik nosozlik oqibatida poytaxtning Mirobod, Yunusobod, Mirzo Ulug‘bek, Shayxontohur va Olmazor tumanlaridagi ayrim hududlarda elektr energiyasi yetkazib berishda vaqtincha uzilishlar kuzatildi.
Shuningdek, chiroq o‘chishi Toshkent metropoliteni ishiga ham ta’sir ko‘rsatdi. Metro ma’muriyatining tushuntirishicha, aynan soat 12:41 da shahardagi yuqori kuchlanishli elektr tarmoqlaridagi uzilish sababli “O‘zbekiston”, “Chilonzor” va “Yunusobod” yo‘nalishlarida qisqa muddatli elektr ta’minoti buzilgan.
Elektr quvvati yo‘qolishi oqibatida poyezdlar harakati va bekatlardagi yoritish tizimlari vaqtincha to‘xtab qolgan. Favqulodda vaziyat yuzaga kelishi bilan metro mutaxassislari holatni nazoratga olib, yo‘lovchilar xavfsizligini ta’minlash hamda bekatlar faoliyatini uzib qo‘ymaslik uchun zaxira generatorlarini ishga tushirishgan.
Soliq va energetika sohasi xodimlari nosozlikni tez fursatda bartaraf etishga muvaffaq bo‘lishdi. Soat 13:01 da transformatordagi muammo hal qilindi. Energetika vazirligi soat 13:22 dan boshlab barcha iste’molchilarga hamda metro liniyalariga elektr energiyasi yetkazib berish to‘liq tiklanganini ma’lum qildi.
