Davlat rahbari Shavkat Mirziyoyev 8-may kuni Mudofaa vazirligining Markaziy harbiy klinik gospitaliga tashrif buyurib, Ikkinchi jahon urushi qatnashchilari va mehnat fronti faxriylari bilan uchrashdi.
Prezident Akmal ota Akramov, Vera Juravskaya, Hasanboy ota Xalmatov hamda Vladimir Alekseykov bilan samimiy suhbat qurib, ularning salomatligi va kayfiyati bilan qiziqdi. Shavkat Mirziyoyev faxriylarning bosib o‘tgan og‘ir va shonli yo‘li butun xalqimiz uchun matonat maktabi ekanini alohida e’tirof etdi.
Uchrashuv davomida prezident faxriylarni tarixning tirik guvohlari va jasorat timsoli deb atadi. Davlat rahbarining ta’kidlashicha, bugungi tinch va osuda hayot, kelajak avlodlarning baxtli taqdiri aynan mana shu insonlarning mislsiz fidoyiligi natijasidir. Nuroniy otaxon va onaxonlarning o‘gitlari bugungi kunda davlat boshqaruvi va jamiyat hayotidagi ezgu ishlarni amalga oshirishda katta ma’naviy madad bo‘lib xizmat qilishi qayd etildi.
Joriy yilning 16-aprelidagi prezident qaroriga asosan, urush qatnashchilari va mehnat faxriylariga alohida e’tibor qaratilmoqda. Ularga moddiy va ma’naviy rag‘bat bilan birga, sog‘liqlarini tiklashlari uchun respublikaning eng yaxshi sanatoriylariga imtiyozli yo‘llanmalar ajratilmoqda. O‘z navbatida, faxriylar ko‘rsatilayotgan g‘amxo‘rlik va tarixiy xotirani tiklash borasidagi tizimli ishlar uchun davlat rahbariga minnatdorchilik bildirdilar.
