O‘zbekiston va Škoda Group 143 mln dollarlik elektropoyezdlar yetkazib berish bo‘yicha shartnoma imzoladi. Kelishuv doirasida xizmat ko‘rsatishni mahalliylashtirish va yangi mutaxassislar tayyorlash ko‘zda tutilgan.
Mamlakatimiz transport infratuzilmasini tubdan yangilash strategiyasi doirasida «O‘zbekiston temir yo‘llari» hamda Chexiyaning mashhur Škoda Group xoldingi o‘rtasida strategik hamkorlik bitimi tuzildi.
Mazkur shartnomaga ko‘ra, o‘nta yangi avlod elektropoyezdlarini yetkazib berish ko‘zda tutilgan bo‘lib, loyihaning umumiy qiymati 3 milliard chex kronasidan (taxminan 143 million AQSH dollari) oshadi. Shartnoma imzolanishi O‘zbekiston Prezidenti Shavkat Mirziyoyev va Chexiya Bosh vaziri Andrey Babishning uchrashuvi doirasida bo‘lib o‘tdi. Boltiqbo‘yi davlatlari tajribasidan o‘tgan texnik platforma asosida ishlab chiqariladigan ushbu poyezdlar respublika hududlarida yo‘lovchi tashish sifatini oshirishga xizmat qiladi. Kompaniya rahbari Petr Novotniy ushbu kelishuvni ikki davlat hukumatlari o‘rtasidagi ko‘p yillik ishonchli muloqotning natijasi deb baholadi.
Loyiha poyezdlarni shunchaki xarid qilish bilan cheklanmay, ularni texnik qo‘llab-quvvatlash tizimini ham o‘z ichiga oladi. Kelishuvga ko‘ra, Škoda Group poyezdlariga xizmat ko‘rsatuvchi servis markazlari bevosita O‘zbekistonda tashkil etiladi. Bu bosqichda chexiyalik mutaxassislar o‘z tajribalarini mahalliy muhandislarga o‘rgatishadi, natijada kelajakda poyezdlarni ta’mirlash va texnik nazorat qilish ishlari to‘liq mahalliy hamkorlar tomonidan amalga oshirilishi ta’minlanadi. Shuningdek, tomonlar o‘zaro hamkorlikda qo‘shma korxona tashkil etish va temir yo‘l sohasi mutaxassislarini tayyorlashga ixtisoslashgan Škoda Academy loyihasini hayotga tatbiq etishga kelishib oldilar.
