O‘zbekiston yo‘llarida qoidabuzarliklarni qayd etuvchi avtomatlashtirilgan tizimlar haydovchilarning jarima ballariga bevosita ta’sir ko‘rsata boshladi. YHXDX ma’lumotlariga ko‘ra 22-aprel holatiga ko‘ra respublika bo‘ylab 22 638 nafar haydovchi o‘z hisobiga 5 jarima ballini yozdirib qo‘ygan.
Joriy oy boshidan e’tiboran jarima ballari nafaqat inspektorlar tomonidan balki kameralar qayd etgan qoidabuzarliklar uchun ham avtomatik tarzda hisoblanmoqda.
Hozirgi vaqtda ballar to‘planishi bo‘yicha vaziyat ancha jiddiy tus olmoqda. 3 nafar haydovchi allaqachon 10 ball to‘plagan va haydovchilik guvohnomasidan mahrum bo‘lishga juda yaqin turibdi. Ma’lumki 12 ball to‘plagan shaxs avtomatik ravishda mashina boshqarish huquqidan mahrum etiladi biroq hozircha mamlakatda bunday yuqori ko‘rsatkichga yetganlar qayd etilmagan. 5 ball to‘plagan barcha haydovchilar xavf hududidagi shaxslar ro‘yxatiga kiritilgan.
Jarima ballari tizimining to‘liq ishga tushishi yo‘llarda tartibni saqlashning muhim vositasiga aylandi. Endilikda kameralar orqali aniqlangan tezlikni oshirish yoki taqiqlangan chiroqda o‘tish kabi qoidabuzarliklar haydovchining shaxsiy profilida jamlanib boradi. YHXDX haydovchilarni hushyorlikka chorlab bir yil davomida to‘plangan 12 ball guvohnomadan vaqtincha ayrilishga sabab bo‘lishini yana bir bor eslatib o‘tadi.
Izohlar
Hozircha izohlar yo‘q