Toshkent shahar Ichki ishlar bosh boshqarmasida YPX inspektori Xosilbek Eshnazarov xotirasiga bag‘ishlangan yodgorlik majmuasining ochilish marosimi bo‘lib o‘tdi. Eslatib o‘tamiz, inspektor voyaga yetmagan shaxs boshqaruvidagi BMW M4 avtomobili urib ketishi oqibatida qahramonlarcha halok bo‘lgan edi.
Davlatimiz rahbari Shavkat Mirziyoyev ko‘rsatmasi bilan qahramon inspektorning oilasiga har tomonlama yordam ko‘rsatilmoqda. Xususan, oila a’zolariga Toshkent shahridan uch xonali kvartira topshirildi. Shuningdek, marhum inspektor vafotidan so‘ng taqdirlangan «Jasorat» medali uning otasiga tantanali ravishda topshirildi.
Davlat tomonidan oilaga ko‘rsatilayotgan ijtimoiy kafolatlar:
-
Ta’lim: Halok bo‘lgan inspektorning uch nafar farzandi yurtimizdagi oliy o‘quv yurtlarida bepul ta’lim olish huquqiga ega bo‘ldi.
-
Tibbiy xizmat: Inspektorning ota-onasi Ichki ishlar vazirligi tizimidagi shifoxonalarda bepul davolanish imkoniyatiga ega bo‘ldi.
Qahramonlik xotirasi
Xosilbek Eshnazarovning hamkasblari uning o‘z hayoti evaziga qoidabuzarni to‘xtatib, yo‘llarda yanada mudhishroq fojianing oldini olganini alohida ta’kidlashdi. Qahramonning xotirasi mangu saqlanishi maqsadida uning tug‘ilib o‘sgan joyi — Qashqadaryo viloyati G‘uzor tumanidagi 62-sonli maktab hududida ham yodgorlik o‘rnatiladi.
Ichki ishlar vazirligi matbuot xizmati ma’lumotlariga ko‘ra, O‘zbekiston mustaqilligi yillarida o‘z xizmat burchini bajarish chog‘ida 118 nafar ichki ishlar xodimi halok bo‘lgan.
