Toshkentning Sergeli tumanida 1985-yilda tug‘ilgan ayol 3 yoshli qizini 10 ming dollarga sotayotganda ushlandi. Unga nisbatan odam savdosi bo‘yicha jinoiy ish ochildi.
Toshkent shahrining Sergeli tumanida o‘z farzandini pullamoqchi bo‘lgan ayol huquq-tartibot idoralari tomonidan qo‘lga olindi. Ichki ishlar vazirligi ma’lumotlariga ko‘ra, IIV Tezkor-qidiruv departamenti hamda Korrupsiya va iqtisodiy jinoyatlarga qarshi kurashish boshqarmasi xodimlari hamkorligida maxsus tezkor tadbir o‘tkazilgan. Unda 1985-yilda tug‘ilgan ayol o‘ziga avvaldan notanish bo‘lgan shaxsga 3 yoshli qizini 10 ming AQSH dollari evaziga sotayotgan vaqtida ashyoviy dalillar bilan ushlangan. Mazkur holat yuzasidan ayolga nisbatan Jinoyat kodeksining 135-moddasi 3-qismi «b» bandi (odam savdosi) bilan jinoyat ishi qo‘zg‘atildi va hozirda tergov harakatlari olib borilmoqda.
Bu O‘zbekistonda onalar tomonidan o‘z farzandini sotishga urinish bilan bog‘liq birinchi holat emas. Avvalroq Surxondaryo viloyatining Termiz tumanida to‘rt kunlik chaqalog‘ini 1500 dollarga sotmoqchi bo‘lgan ayol sud hukmi bilan 6 yilga ozodlikdan mahrum etilgan edi. Shuningdek, Buxoro tumanida ham mudhish voqea qayd etilib, unda 2008-yilda tug‘ilgan voyaga yetmagan ona o‘zining hali uch kunlik ham bo‘lmagan qiz farzandini to‘rt ming AQSH dollariga sotishga uringan vaqtida qo‘lga olingan edi.
Izohlar
Hozircha izohlar yo‘q