Toshkentda jinoyatchilar o‘g‘rilik qilish maqsadida tunda uylarga kirishni boshladi. Poytaxtning Yashnobod tumanida tunda uxlab yotgan fuqaroning xonadoni va BYD avtomobilini tunab ketgan shaxsga nisbatan jinoyat ishi qo‘zg‘atildi.
Poytaxt huquq-tartibot idoralari jinoyatchilar uylarga tunda, ya’ni uy egalari uxlab yotgan vaqtda o‘g‘rilik qilish maqsadida kirishi holatlarini qayd etmoqda. Shunday voqealardan biri Yashnobod tumanining “G‘uzal” mahallasida yuz berdi.
Jabrlanuvchi, 2003-yilda tug‘ilgan Maxmudjon T. ishdan charchab qaytgani sababli vaqtliroq uxlashga yotgan. 14-mayga o‘tar kechasi, soat taxminan 01:30 larda uning xonadoniga noma’lum shaxs g‘ayriqonuniy ravishda kirgan. Jinoyatchi uydan 5 000 000 so‘m va 200 AQSh dollari hamda BYD Song Plus Champion avtomobilining kalitlarini o‘g‘irlagan. Shundan so‘ng u mashina salonini ochib, u yerdan yana 7 200 000 so‘m pulni olgan va voqea joyidan yashiringan.
Mulk egasi o‘g‘rilikni payqagach, darhol Yashnobod tumani IIO FMBga murojaat qilgan. Huquq-tartibot idoralari xodimlari tomonidan jinoyat tezkorlik bilan ochilib, gumonlanuvchi, 2002-yilda tug‘ilgan Jasur E. qo‘lga olindi.
Hozirda Yashnobod tumani IIO FMB huzuridagi Tergov bo‘limi tomonidan ushbu shaxsga nisbatan O‘zbekiston Respublikasi Jinoyat kodeksining 169-moddasi (“O‘g‘rilik”) bilan jinoyat ishi qo‘zg‘atilib, tergov harakatlari olib borilmoqda. Toshkent shahar IIBB fuqarolardan bunday tungi jinoyatlarning oldini olish uchun xonadonlariga qo‘riqlash signalizatsiyasi tizimlarini o‘rnatishni so‘raydi.
