Ijtimoiy tarmoqlarda 42-sonli avtobusda qizlar va bolalar ko‘z oldida uyatsiz harakatlar qilgan erkak videosi tarqaldi. Toshkent shahar IIBB huquqbuzarni ushladi, sud unga 15 sutka qamoq berdi.
Guvohlarning so‘zlariga ko‘ra, poytaxt avtobuslaridan birida erkak kishi qizlarga qarab, ko‘z-ko‘rona jinsiy a’zosi bilan uyatsiz harakatlar sodir etgan. Voqeaga guvoh bo‘lgan qizning dugonasi ushbu holat salondagi qizlar va yosh bolalar o‘rtasida qattiq qo‘rquv va shok holatini keltirib chiqarganini ma’lum qilgan.
Toshkent shahar IIBB holat yuzasidan rasmiy ma’lumot berib, voqea joriy yilning 3-iyun kuni ertalab soat 09:45 larda 42-sonli yo‘nalishdagi avtobusda sodir bo‘lganini tasdiqladi. Jamoat joyida bo‘la turib uyatsiz harakatlar qilgan va tartibni buzgan yo‘lovchi 1978-yilda tug‘ilgan fuqaro ekani aniqlangan.
Olib borilgan tezkor tadbirlar natijasida ushbu erkak ichki ishlar organlari xodimlari tomonidan aniqlanib, qo‘lga olindi. Huquqbuzarga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) bo‘yicha ma’muriy bayonnomalar rasmiylashtirildi.
To‘plangan barcha hujjatlar jinoyat ishlari bo‘yicha sudga taqdim etildi. Sud materiallarni ko‘rib chiqib, qonunbuzarga nisbatan 15 sutka muddatga ma’muriy qamoq jazosini tayinlash haqida qaror chiqardi.
